I misteri d’Anarulia
Dopu à avè lacatu Cariutera è u so sistema, Lirl era
più accapatu ch’è mai. A so missione, a so opera, d’andà à ramintà tutti i Cariutiani di l’universu per organizà u ritornu di u populu cariutianu in terra soia viaghjava bè ; troppu bè, li
paria. Dopu à u stalvatoghju di a so incarcerazione in Izuzzò, tuttu s’era bè passatu, è per ellu, ùn era micca naturale. Ancu a so incarcerazione izuzzonincha s’era passata troppu bè. Li paria
veramente chì a furtuna viaghjava cun ellu, per schjarì u so caminu d’una luce di riesciuta. Li paria chì tutte e divinità cariutiane eranu daret’à ellu per sustene a so missione. Mà Lirl era
sempre statu ateu. Per ellu, nisun putenza superiore in l’universu. Allora, per a prima volta di a so vita, cumminciava à rimette in causa e so certitudine e più prufonde. Cumminciava à
dumandàssi s’è a so missione, u scopu di a so esistenza, ùn fusti d’ispirazione divina.
E raghjone di stu cambiamentu misticu eranu podasse à
circà versu u fattu ch’ellu s’avicinava di a fine di a so missione. Per a prima volta di a so vita, era à u puntu di rientrà in u sistema di a so pianeta : u sistema di Gliese/Nolioris. Per a
prima volta di a so vita, pudia cuntemplà a luce di a stella di i so antennati : a famosa Nolioris a rossa. Nolioris, chjamata Gliese dà l’umani, ùn era una stella cume u sole, ne mancu cume a
stella ch’illuminava Gherccebà o Cariutera : era una nanna rossa ; piccula stella rossa. Ùn era micca cusì pudente ch’è u sole, Nolioris, mà era a stella sotta à a quale avianu campatu i so
antennati. È pò sopra tuttu, era a prima volta ch’ellu vidia à so pianeta, i so uceani, i so cuntinenti, e so ghjacce bureale. Ancu s’ell’ùn si calò micca, stu feghju dà u spaziu, di a so pianeta
natale ùn fù senza effettu nant’à ellu. Infine li paria chì tutte e so brame dapoi tant’anni, eranu ghjunte à a so fine.
Sta scuperta avia qualche effetivamente qualche
raghjò di rende Lirl più misticu. Mà, sapia dinù chì a fine di u viaghju ùn era per u subitu. Ch’ellu devia prima andà à piglià cuntattu cun i Cariutiani d’Anarulia, quelli detti di a prossima
diasporà, per cunvicheli di seguitàlu per u Gran’Ritornu.
Per cummincià, cum’ell’avia fattu in u sistema
noscliurianu, mandò parechji missaghji radiò per piglià cuntatti, è, quandu ebbe ricevutu a risposte di l’autorità anaruliane, accennenduli un’terrenu per calà u Vededelà, capì chì l’anaruliani
ùn eranu ostile à l’idea d’un ritornu nant’à Cariutia.
Una volta u vascellu calatu in un’locu disertu, Lirl,
sempre accumpagnatu dà Lughjarcu, escì dà u so vascellu, per andà à a scontra di l’abitanti. Facia u fretu nant’à Anarulia, ancu più fretu ch’è nant’à a Terra, Gherccebà, o ancu Cariutera. A luce
di a stella era assai debule, è a timperatura ùn francava micca 5 gradi. U paesaghju era custituitu d’una piana ghjacciata quasi senza rilievu, è cun’poche custruzzione. Ùn ebbinu micca à aspettà
longu chì una delegazione di trè Cariutiani, chì s’era spezialmente custituita per ricevelu, venì à a so scontra.
È tantu cumminciò a discuzzione trà Lirl, Lughjarcu,
è i trè anaruliani :
« Salut’à tè, Lirl di Fulzen, Palatinu di u
Santu Ritornu. Mille voce, dà Izuzzò fin’à Alnaris anu cantatu e to lode, o eroe di u Populu Cariutianu. Simu onurati di pudè rispirà l’aria ch’è tù rispiri. »
Lirl, chì cumminciava à esse techju di sta manera
cacasintenziosa di fà e prisentazione, rispose un’pocu aridamente :
« Sò anc’eiu onurati di fà a vostra
cunniscenza… »
I trè pieniputenzarii, pocu abituati à una risposta
cusì corta firmonu lolli qualche seconde. Pò, u più allelleritu di i trè, ripigliò :
« Sapemu tuttu di e to brame. Simu d’accunsenti
per rigirà nant’à a nostra pianeta natale. Capimu avà chì si pesa un’alba nova duve u populu cariutianu serà, un’altra volta adunitu nant’à una sola pianeta. Grazi’à u to vascellu pudentissimu è
sfrecciatu sfrecciatu, tutti l’esiliati di Gherccebà è di u sistema noscliurianu puderanu infine rientrà ind’è elli, mà, noi, Cariutiani d’Anarulia a freta, Anarulia a vicina, noi ùn simu mai
partuti di u sistema di i nostr’antennati. Nant’à sta pianeta vicina di Cariutia a Santissima, avemu custruitu duie cità : Nova Nerziba, è Nov’Azomkil. »
Allora chì u Cariutianu si tacì, Lughjarcu, ch’ùn
cunniscia ne l’una, ne l’altra, dumandò :
« Perchè ste cità si chjamanu "nove", o signori
? »
Fù Lirl chì rispose :
« Perchè e cità d’Azomkil è di Nerziba esistenu
nant’à Cariutia. È quandu a ghjente, venendu d’Azomkil, o di Nerziba, anu custruitu e cità nant’à sta pianeta, anu vulsutu dà i nome di e so cità d’origine, in ommagiu. Ùn pocu cume "New York" è
"New Orleans". Capisci, avà, o Lughjà. »
« Iè. Ti ringraziu, o
Lirl. »
Mà i trè mandataghji ùn avianu micca apprezziatu
st’interruzzione, sta tagliatura di parolla, sopra tuttu venendu d’un stranieru ch’ùn era mancu cariutianu. Quellu chì parlava à Lirl, nanzu ch’ellu fusti intermessu, ripigliò, un pocu
inacerbitu, a parolla :
« E nostre cità di Nova Nerziba è di Nov’Azomkil
tutalizanu cinque millione d’anime. È nant’à l’avanzu di a pianeta, ci hè un’millione cinque centu milla anime. Vole dì chì simu sei millioni cinque centu milla Cariutiani à campà nant’à sta
pianeta cutrata. A vita quì, ùn hè tantu dispiacevule, mà face u fretu, dunque e cuazzione di pruduzzione ci impede di fà cum’ellu si deve per sviluppà sta pianeta propiu bè, è un’certu numaru
d’i nostri cuncitatini ùn pensanu ch’è à rientrà nant’à a nostra pianeta ch’è no avemu lacatu tant’anni fà. »
U Cariutianu marcò un’rifiatu nant’à u so discorsu,
pò ripigliò :
« Ùn simu tantu luntanu di Cariutia. Pensu à
l’izuzzoninchi o i cariuteriani chì, senza u vostru vascellu, ùn averianu mai pussutu rientrà prestamente nant’à Cariutia, mà noi… noi simu vicini di Cariutia ; incù i nostri vascelli, pò andà
prestu. Simu bramosi di parte dà quì, avemu i medii di parte dà quì, è puru firmemu quì. »
Nè Lughjarcu, nè mancu Lirl, ùn capiscianu sta
spiegazione. Postu chì i Cariutiani d’Anarulia avianu laziu è medii d’andàssine, perchè firmavanu sempre nant’à Anarulia. Mà l’anarulianu ùn tardò micca hà dà a spiegazione :
« S’è no firmemu quì, hè solu perchè simu
ubligati di firmà quì. Quand’i nost’antennati sò ghjunti per a prima volta nant’à sta pianeta, anu scupertu assai prestu chì sta pianeta ùn era diserta. Ci eranu qualche forme di vita primitive,
piante è animali pochi intelligenti. Mà, in più di què, in più d’essari senza intelligenza cume quelli chì campanu nant’à Gherccebà o Cariutera, ci eranu cert’essari misteriosi : i
Scalpillinuti. »
È, di colpu u diplumatu anarulianu, fù, cume i so dui
cumpagni muti, trascorritu dà un’abbricciulamentu di terrore. Paria ch’ùn chì li facia male di cuntà a seguita, di parlà di què. A paura si leghjia in i so ochji, è Lirl si dumandava cosa eranu
s’essaricusì terrifianti chì impedianu u ritornu di l’anaruliani. Mà in fattu, cun assai curraghju, ripigliò, atterrissitu :
« Sò… sò spezie di spiriti… di visione… d’ombre…
d’anime perse… è si trovanu scultati in e terre bureale di a nostra pianeta… Si dice ch’elli so i veri maesti di… d’Anarulia… È tutti quelli chì so andatu in sti rughjonu… anu smaritu per u
sempre… S’essari so a maledizzione di sta pianeta… È… è quande i nostri antennati so ghjunti à stallàssi quì, st’essari li anu parlatu, pruibbenduli di riparte di sta pianeta per u sempre… È
tutti quelli chì anu pruvatu quantunque si so morti… Hè per quessa chì dapoi parechji millenarii, più nimu n’hè mai partutu dà quì… Ùn si vedenu mai… mai, st’essari, mà… mà sò pudenti… pudenti in
veru… »
Lirl è Lughjarcu eranu assai dubbitativi cuncernendu
sta fola. Certe, cume tutte e fole, ci era sicuramente una parte di verità, mà per elli, ùn pudia micca esse tutalmente vera. Ch’ellu ci fussi qualcosa in i rughjoni bureali di sta pianeta era
podasse veru, mà ùn pudia esse ch’è qualcosa di cuncretu, è nunda chì u cartesianisimu ùn pudessi spiegà. Mà, in fattu, l’anaruliani ùn avianu finitu di parlà, è allora chì Lirl è Lughjarcu eranu
ciuffati in e so pinsate, ripigliò :
« Tutte e notte, à mezanotte, u celu, dà bughju,
divente chjaru cume in pienu ghjornu. Stu fenomenu, ùn dura ch’è qualche seconde, mà sapemu chì so elli chì u facenu… »
È unu di i dui altri anaruliani, sughjunghjì
:
« È sapemu dinù chì quandu stu fenomenu
pianterà, vulerà dì chì seremu, torn’una volta, libari di parte di sta pianeta per rigirà nant’à Cariutia. »
Lirl era cunturbatu. Tutta s’affare ùn li parianu
esse ch’è fantucula buffa di un populu persu. Mà in fattu, cumminciava anc’ellu à avè a paura di st’essari surnaturali chì parianu cusì terrebuli. Sopra tuttu, era più ch’è primurosu di vede dà i
so ochji u fenomenu straniu ch’elli li avianu discrittu l’anaruliani. È s’ell’era vera ? È sè st’essari esistianu in veru ? Cum’ellu avia dà fà per cuntinuà a so missione ? Cum’ellu avia dà fà
per cunvinche l’anarulianu di vene cun’ellu ? Fù cusì chì u so scopu finale pigliò a suprana nant’à sta paura, è ch’ellu dumandò :
« È chì ne pinsate s’o andessi in sti rughjoni
salvatichi è cutrati per scuntrà st’essari, è pruvà, in casi, à cunvichelli di lacavvi parte dà quì ? »
Sta pruposta lampò un’fretu nant’à i trè anarulianu.
A sol’idea di pinsà à andà fà un’viaghju in sti lochi maladetti li tetanisavanu. U più curraghjosu di i trè, dopu à parechje longue stonde di silenziu, rispose, incuerente :
« Ùn ci vole micca à andà quallà, o Signore
Palatinu ! Ùn ci vole ! Quallà, hè a morte chì vi truverà o Lirl di Fulzen ! Ùn ci vole ! Mà… mà vi dicu un’affare… Hè ch’è si vò parveniate à fà piantà l’illuminazione notturna di u celu ;
vulerà dì chì puderemu parte… Mà nò, o Signore, ùn fate nunda, hè troppu periculosu per voi… Serà a morte assicurata per voi ! »
Lirl, era pinsosu. A paura di i so interlocutori
anaruliani cumminciava à cuntaminàlu. Mà d’altronde, sapia chì per ch’elli riescì a so missione, ellu avia à francà sta paura. Fù per quessa chì, sulenne, annunciò :
« Ci anderaghju ! »
Dopu à st’adansciamentu duve Lirl avia decisu,
insischendu i so interlocutori anaruliani, d’andà in i rughjoni bureali di a pianeta per andà à vede cosa era l’origine di u fenomenu d’illuminazione mezanottincha di u celu per fàllu piantà è
cusì, cunvinche l’anaruliani di seguitàllu cun ellu per u Gran’Ritornu, Lirl è Lughjarcu avianu seguitatu i trè anaruliani, fin’à a so cità, Nov’Azomkil, duve ricevinu
l’uspitalità.
Per fà u so viaghju fin’à e terre bureale d’Anarulia,
Lirl aviu decisu d’andà à pedi, senza nisun veiculu, è, sopra tuttu, senza Lughjarcu, firmatu in Nov’Azomkil : u ghjornu dopu à a so ghjunta nant’à Anarulia, Lirl aviu vistu dà i so occhji
l’illuminamente di mezanotte, è cumminciava à crede dà veru chì un’tal fenomenu ùn puddia micca esse, ne naturale, ne artificiale, è dunque, chì tutte e fole chì l’anaruliani li avianu cuntatu
eranu podasse vere, è di colpu, ùn vulia micca risicà a vita di u so amicu Lughjarcu : a missione era a soia, è sola a soia ; era u solu chì devia risicà a so vita quì.
Ben ch’andendu à pedi, purtava cun’ellu tuttu
l’equipagiamentu, imprestatu dà l’anarulianu, per andà avventuràssi in e terre bureale ancu più cutrate chì l’avanzu di a pianeta, duve a timperatura calava sott’à - 30 gradi, purtendulu in un
saccu à spinu chì pisava più di sessante chilò.
Fù cusì chì Lirl, dui ghjorni dopu à a so ghjunta
nant’à Anarulia, partendu dà a cità di Nov’Azomkil, cumminciò u so viaghju per andà à scuntrà i terribuli scalpillinuti. A matina di u terzu ghjornu, allora ch’ellu s’appruntava à parte di a
cità, fù salutatu dà tutti l’anaruliani chì l’avianu ricevutu cume s’ella fù l’ultima volta ch’elli u vidianu. Certi, ancu pienghjianu, è Lirl era assai sorpresu, è cumminciava à pinsà dà veru
ch’è u periculu era podasse reale. Pò, dopu à avè salutatu tuttu u mondu, Lughjarcu in ultimu, pigliò u caminu di u norde, sott’à u celu palidu è nivulosu d’Anarulia.
Anarulia era una pianeta cun pocu rilievu. U celu era
palidu, mà Nolioris (u so sole) ùn mandava ch’è pocu lume, è per quessa, u fretu era onnipresente.
Lirl, dopu à avè lacatu Nov’Azomkil daret’à ellu,
cumminciò u so longu viaghju versu u norde, solu cù u so saccu è a so cuscenza.
I primi ghjorni di viaghju ebbinu per quatru una
piaghja diserta senz’animali, è cun pocu vegetazione. Quale sia a direzzione di u so sguardu, era sempre listess’affare : una piaghja diserta cun pocu vegetazione. Un ghjennaru di paesaghju moltu
aghjacchente. Lirl viaghjava tutt’u ghjornu, piantendussi u menu pussibule per u perde micca tempu. Ùn manghjava ch’è pocu, solu qualche piante, poche nutriscente, ch’ellu cuglia à mezu à u so
caminu. Quandu venia a notte, quand’ell’era più ch’è stancu mortu, si chjinava direttamente nant’à a terra, per arripusàssi qualche ore nanzu di ripiglià a so strada, chì firmava sempre cusì
longa. Quand’ell’era mezzanotte, era sempre svegliatu per pudè rimirà l’illuminazione surnaturale, chì l’affascinava in crescendu, senzu ch’ellu sapessi perchè. È ogni ghjornu s’assumigliava à
ogni ghjornu. Lirl era solu per a prima volta di a so vita, è cumminciava à sente chì stu viaghju era più impurtante ch’ellu cridia prima. Allora ch’ell’avia intrapresu sta longa strada solu per
rassicurà l’anarulianu nant’à l’origine di un fenomenu straniu, cumminciava à risente, à u più prufondu di a so anima, ch’ell’andava à a scontra di u so destinu. Micca necessariamente un destinu
funestu, o un destinu di morte, mà simpliciamente u so destinu, un’puntellu maiò di a so vita. A sulitudine, a sott’alimentazione, u fretu, è a fatica… tuttu què agiscia nant’à ellu, scambiendu a
so mente. Avà ch’ellu avia u tempu di pinsà, cummincia à dumandàssi s’è a missione ch’ellu s’era fissatu, di ramintà tutta a diasporà cariutiana fin’à u so paese d’origine, fù veramente un’idea
soia, o s’ell’era d’ispirazione suprana. Percorria u so caminu spirituale cum’ellu percorria u so caminu cuncretu, versu e terre bureale, è tutte e fole e leggende chì a so mamma l’avia cuntatu
dà chjucu li rivenianu in mente, pensendu, per a prima volta di a so vita, ch’ell’eranu podasse a verità. Si dumandava dinù perchè avia tantu insistatu per andà a pedi senza veiculu, è solu. Si
dumandava chì forza l’avia incitatu à sceglie a strada a più difficiule. Certe viaghjava, per a prima volta di a so vita, sott’à u lume di a so stella, è ne pigliava un’veru piacè, mà sapia
ch’ellu ci era un’altr’affare : un’affare ch’ell’ùn pudia numinà, un’sintimentu cumpletamente novu per ellu, troppu suttile per ellu, chì andava propiu bè cù u so novu statu di
pelerinu.
I ghjorni passavanu, è Lirl ùn si infiacchia micca. U
fretu increscia à misura ch’ellu s’avvicinava di u norde, è ancu e corcie piante ch’ellu manghjava, si facianu scarsulate. Sta smariscione prugressiva l’alterava appena, postu ch’ellu cumminciava
à dumandassi cio ch’ellu puderia manghjà quand’ùn ci serà più nunda. L’illuminazione mezanottinca divintia sempre più pudente, è Lirl si dumandava s’ell’era perchè s’avvicinava di a surghjente di
st’illuminazione, o s’ell’era perchè era a so ghjunta chì agiscia nantu. Quaranta ghjorni dopu à a so parte di Nov’Azomkil, Lirl scorgì, à u luntane, u principiu d’una catena di muntagne. Sta
vista incallò grandemente u core di Lirl ; prima perchè era più ch’è techju di sta piaghja senza fine, è dopu perch’ellu sapia chì s’avvicinava di a fine di u so viaghju : l’anaruliani li avianu
dettu chì era precisamente à sta catena di muntagne ch’appartenia u famosu Monte Decivezu, u so scopu, induve, second’à l’anaruliani, si truvavanu i scalpillinuti.
I ghjorni dopu, Lirl, ben’ch’è allancatu è stancu,
s’affrettò d’avvicinassi u più di u Monte Decivezu. Per nutriscesi, s’era custituitu una massarizia di tuttu cio ch’ellu truvava in u so caminu è chì era manghjaghju (erbe è piante). A fame ùn li
fecia più soffre cume i primi ghjorni. Ùn pinsava più, o poche micca à u so corpu è i so bisogni curpurali. Solu impurtava a so missione, è a so certitudina nova nova chì era quì, solu in un locu
persu, per fà qualcosa d’impurtantissimu.
Torn’una decina di ghjorni dopu, è e culline
divintianu muntagne. U terrenu era più difficiule, mà què, à Lirl, li piacia, li piacia ancu più ch’è a piaghja. A timperatura era calata à – 60 gradi, mà Lirl, ùn sentia più u fretu. Ùn
s’interrugava mancu più nant’à a pertinenza di a so venuta quì o nant’à u possibulu periculu chì l’aspettava ; solu avia in capu u fattu ch’ellu devia vene è ch’ell’era venutu. È ogni notte, si
discitava sempre per cuntimplà l’illuminazione di u celu, chì, allora ch’ell’era vicina di a surghjente d’emissione, era pudentissima, è più bella ch’e mai. D’altronde, Lirl, chì vidia infine u
Monte Decivezu dà i so ochji, vidia infine chì l’illuminazione partia bè dà a cima di u monte. È tutti i ghjorni, s’avvicinava sempre di più di u so scopu, di u Monte
Decivezu.
Mà in fattu, Lirl, ùn pinsava più à a raghjone di a
so presenza nant’à i lochi. Per ellu, sentia ch’ellu era di u so compitu d’andà quallà, è ùn pruvava più à dumandàssi perchè. È più s’avvicinava di u so scopu, di a cima di u Monte Decivezu, è
più era quessa a so pinsata.
Una sera, qualche ore nanz’à mezanotte, Lirl parvenì
infine à a cima di u Monte Decivezu. Dà culà, avia una vista tremenda nant’à tutte e muntagne di u circondu. U Monte Decivezu ùn li paria micca esse a più alta, nè a più difficiule à scalà… Mà
sopra tuttu, cio ch’ellu rimarcava u più, era ch’ùn ci era nunda ! Manc’un’segnu d’una verunqua presenza surnaturale ! Manc’un’segnu di i scalpillinuti, s’essari fantastichi tanti straniu dà
i quali l’abitanti di Nov’Azomkil li avianu parlatu ! Era a cima urdinaria d’un’alta muntagna urdinaria ! Mà Lirl sapia propiu bè chì u Monte Decivezu ùn pudia esse una muntagna urdinaria. L’avia
vistu l’illuminazione chì partia da a cima. Ci vulia una spiegazione per stu fenomenu. Ùn pudia micca piantà cusì, u so viaghju. Micca nantu a cima urdinaria d’una muntagna urdinaria. Sinnò, u so
viaghju ùn averia ghjuvatu à nunda. Solu à fà perdellu tempu. È à avè ritardatu a cumpienda di a so missione. Lirl era dilusu.
Mà allora ch’ell’era in pienu pensamentu, si sentì
cascà. Micca in daretu ni in davantu, no, cascò, cume s’è a terra si sprufundia sott’à ellu. Cume s’ell’era in un’ascensore chì fallava. Lirl ùn ebbi mancu u tempu di spaventàssi chì u so
cadimentu si piantò, chì a terra sott’à ellu piantò u so muvimentu, è ch’ellu si ritruvò in u core di a muntagna, in una spilunca, cumpletamente chjosa, mà straniamente illuminata. Mà, n’era
sicuru, a so fallata ùn era micca naturale ; ùn era micca cascatu in un’tuvone, era a terra chì era fallata sott’à ellu. U tempu per ellu di ripiglià u so spiritu, di vede ch’ell’era in una
spilunca, è chì a so fallata ùn pudia micca naturale, ch’infine, allora ch’ellu guardava e parete di a spilunca, ch’infine, vì à elli.
I scalpillinuti !
Eranu cinque. Cinque essari scultati nant’à a pareta
di a spilunca. S’assumiglianu, dà luntanu, à una siluetta umana, mà dinù cariutiana, tantu i munti eranu imprecisi. I cinque essari lucianu dà per elli, è eranu talamente luminosi chì Lirl
risentia qualche difficultà per guardàlli.
Pò, nanzu chì Lirl n’ebbi u tempu di prughjettà una
qualunque azzione, unu di st’essari pigliò a parolla :
« Ùn ti spaventa, o Lirl. Si in locu
sicuru. »
A voce era forte, auturitaria, è dolce. Era dinù
piena di saviezza. Esattamente a voce chì omu aspetta, venendu d’essari superiori. L’essari ripigliò :
« L’Anaruliani ci chjamanu i scalpillinuti. Noi,
simu e Sintinelle. »
Lirl si sintia cerbelloticu. D’una banda si sintia
indegnu d’adirizzà a parolla à st’essari cusì impurtante, è d’un’altra banda vulia capì, vulia sapè. È per quessa chì dumandò :
« E Sintinelle ? »
« Simu i guardiani di u Populu Cariutianu. È
bramemu u so ritornu. » Rispose una di e Sintinelle.
« Face parechji millenarii ch’è no aspettemu stu
mumentu. Avà, infine, u Salvatore hè ghjuntu. » Sughjunghjì un’altra.
« U Salvatore ? » Dumandò Lirl, assai
sorpressu.
« Iè. Si tù u Salvatore di u Populu Cariutianu.
N’ai dighjà fattu assai, è u to destinu serà di cuntinuà. Sì l’Elettu di u Populu Cariutianu. » Rispose una Sintinella.
« Dapoi u principiu di a smariscione di u Populu
Cariutianu, operemu per u ritornu, mà ancu cun tutt’a nostra Putenza, nund’ùn era pussibulu nanzu ch’è tù ghjunghjessi. » Precisò un’altra Sintinella.
« Avemu messu tuttu in opera, nant’à sta pianeta
per pudè scuntràtti. » Dichjarò una Sintinella.
« Avemu pruvucatu sti fenomeni per azziccà u
spiritu superstiziosu di l’anaruliani. » Dì un’altra.
« U to stintu naturale di Salvatore di u Populu
Cariutianu ùn s’hè sbagliatu, è ai capitu prima ch’è u to spiritu ebbi capitu perchè, ch’è tù devia vene quì per scuntràcci. » Annunciò un’astra.
Sentendu stu discorsu, Lirl era propiu dubbitativu, è
per quessa dumandò :
« Cume ? Site in tracciu di dìmmi ch’è vo site
spiriti trapudenti è immortali, mà chì senza mè, chì sò u salvatore, ùn pudete fà nunda ? Ùn capiscu micca… È ghjust’à puntu… site sicuru ch’è so eiu, u salvatore ? Chì eiu, ùn sò tantu
strasurdinariu, eiu. »
Una Sintinella rispose :
« Iè. Si tù u Salvatore. È ùn ci vole micca ch’è
tù circhessi à capì. E forze di u destinu so più pudente è più cumplicate ch’è tù credi tù. Si tù chì averà à salvà u Populu Cariutianu. Ai dighjà cumminciatu. Noi, ci simu circuscritti à mette
in piazza tutte e circunstanze per ch’è tù venissi quì oghje, è u fattu ch’è tù ebbi fattu stu longu viaghju solu, in cundizzione streme senza mai rinuncià vole, oramai, dì chì sì tù u
Salvatore. »
« Nant’à sta pianeta, tuttu, era fattu
appostu. » Precisò un’altra Sintinella.
Lirl ùn sapia più cosa risponde, nè mancu cosa pinsà.
L’avenimenti pigliavanu una girata troppu strania, è ancu troppu spirituale per ellu. Ùn li parria micca d’esse un Messia. È puru… è puru, dopu à stu longu viaghju in e terre cutrate d’Anarulia,
in cudizzione poche urdinarie, a so spiritualità s’era svegliata, ellu chì era statu sempre ateu. È cumminciava à dumandàssi s’è e so brame e più prufonde di ramintà u populu cariutianu, a so
missione, cum’ellu dicia eiu, ùn fù d’ispirazione superiore. Li paria d’avè infine a prova di stu fattu. Mà tuttu firmava sempre moltu cunfusu in a so mente, è per quessa, fì a scelta di piantà
di parlà, di piantà di riflette, è di cuntentassi di stà à sente. E Sintinelle cuntinuonu :
« Sì u Salvatore di u Populu Cariutianu, è
un’Gran Destinu t’aspetta. Mà dinù grande prove. Sfidoni tamanti t’aspettanu per a salvezza di u Populu Cariutianu. »
Lirl chì si sintia un’pocu persu, dumandò
:
« O Altissime Putenze di l’Universu. Vi chjamu
per aiutàmmi à compie a mio missione è tuttu cio ch’è vo mi dite ch’è averaghju à fà. »
Una di e Sintinelle li rispose :
« Ùn ai micca bisognu d’aiutu. Ai dighjà in tè
tutte e qualità necessaria à u compiimentu di a to Opera. Ùn t’ammanca ch’una sol’affare : a facultà d’impiegàlle. »
Lirl, era un’pocu dilusu di sta risposta. Mà un’altra
Sintinella sughjunghjì :
« Mà ti femu quantunque un’Gran’Rigalu. Ti femu
daziu di e Tavule di a Cunniscenza. »
« E Tavule di a Cunniscenza ? Mà cosa sò
? » Dumandò Lirl.
A Sintinella li spiegò :
« E Tavule di a Cunniscenza anu l’apparenza
d’una petra nera ettagonale allisciata, nentru a quale sò intarsiate sette petre : un’diamante (biancu), una smeralda (verde), un’rubinu (rossu), un’zaffiru (turchinu), una tupaza (ghjalla),
un’amatista (viuletta), è una zerlina (arancina). »
« Per i prufani, hè solu un’bellu ghjuvellu. Mà
in e Tavule di a Cunniscenza, sò inchjustrate tutte e Cunniscenze di l’Universu. » Annunciò un’altra Sintinella.
« E sette petre riprisentenu sette Pudenze
Suprane ch’ùn ai micca bisognu di cunnosce. » Precisò un’altra.
« Per pudè accede à tutte ste cunniscenze, ci
vole ch’è tù parveni à un’statu superiore di meditazione è di cuncentrazione. » Dichjarò un’altra.
« È stu nivellu quì, ùn l’ai micca per u
mumentu, mà poi avèllu. » Compiò un’altra.
Lirl ùn era mancu più stunnatu. U fattu
ch’un’tal’ughjettu pudia esistà ùn lu surprendia mancu più. Ci eranu troppu accadamenti in listessu tempu per ch’ellu pudessi torna esse sorpressu. Una di e Sintinelle ripigliò a parolla
:
« E per avà, noi, avemu à smarisce, tutti
l’anaruliani smariti dapoi seculi è seculi per esse venuti quì troppu tostu anu à ricumparisce, è truverai quì e Tavule di a Cunniscenza. Seranu toie fin’à a to morte. »
È, dettu què, e Sintinelle smarinu in l’aria, senza
lacà manc’un’orma di u so passaghju, è Lirl ùn devia mai più vedelle. À e so piazze, una bella petra ettagonale nera è allisciata, intarsiate dà sette petre : e Tavule di a
Cunniscenza.
Lirl, ùn pocu stupidu dà tuttu què, pigliò in e so
mane u preciosu ughjettu. À stu mumentu, cum’ell’era fallata prima, a terra sopra a quale era si messi à culà, per purtàllu, esatamente induv’ell’era prima : in cima di u Monte
Decivezu.
È pò, vì una cinquantina di Cariutiani chì eranu
quallà per aspettàllu. Eranu tutti i Cariutiani smariti dapoi parechji millenarii chì s’eranu avvinturati in stu rughjone sacratu. Lirl ùn ebbi mancu u tempu di riflette nant’à cio chì venia
d’accade ch’ellu fù obligatu di parlàlli per pruvà à cunvinchelli di seguitàllu per riturnà à Nov’Azomkil, chì avà ch’ell’avia capitu tuttu, era più ch’è ora di rientre.
U viaghju di ritornu fin’à Nov’Azomkil fù più longu
ch’è prima. Tutti ùn viaghjavanu micca cusì in furia ch’è Lirl, è certi suppurtavanu male a sott’alimentazione. Certi passavanu u so tempu à altercàssu è ancu à battesi. In più di què devianu
esse sempre rassicurati. Lirl si dumandava cio ch’elli avia à divintà, elli. Ùn eranu mancu di a so epica, è serianu sicurament persi à mezu à tutti sti ghjenti ch’ell’ùn
cunniscianu.
Mà sopra tuttu, Lirl, avà ch’ellu ne avia u tempu,
pinsava oramai à ellu. À cio ch’elli li avianu dettu e Sintinelle nant’à ellu, u so scopu, a so azzione. U svelu di a so pusizione di salvatore, o d’elettu li lacava un’impressione moltu strania.
E Tavule di a Cunniscenze eranu un’ughjettu strasurdinariu, è sopra tuttu unicu, preciosissimu. Si dumandava s’ell’era veramente veru ch’ell’era u Salvatore o l’Elettu di u Populu Cariutianu,
cum’elle dicianu e Sintinelle. Sintia chì a so missione ùn era più simpliciamente di ramintà tuttu u populu cariutianu nant’à Cariutia, mà era ancu più grande, più alta, più impurtante. In più di
què devia cumplettamente rivede a so pusizione nant’à a spiritualità.
Mà in fattu, u viaghju di ritornu si passò megliu
ch’è u primu. Lirl rivenia in Nov’Azomkil cù tutt’e so risposte, a certitudina di u benestà di a so dimarchja, è sappia ch’ellu pudia fà u viaghju inversu senza cascà mortu, di fatica, di fretu o
di fame. Di notte, quand’ellu era svegliatu, vidia bè chì l’illuminazione di mezanotte era compie è chì sicuramente, l’anaruliani serianu allora pronti à seguitàllu.
Quand’ellu rientrò in Nov’Azomkil, cun tutti l’altri
Cariutiani, Lirl fù accoglitu dà una populazione entusiastica, in salvatore. Era ellu chì avia fà smarì l’illuminazione mezanottinca, è di colpu, eranu autorizati à rivene nant’à
Cariutia.
U ritornu di tutti quelli ch’eranu smariti dapoi anni
è anni participò à cunvinchelli di sta necessità. Mà Lirl ùn svelò nunda di e Sintinelle, à nimu, preferendu tene sta parte sicreta. È e Tavule di a Cunniscenze fune piattate, ancu à
Lughjarcu.
Fù cusì chì, dui mesi dopu, tutti l’anarulianu
seguitonu Lirl in u Vededelà. Per u Gran’Ritornu nant’à Cariutia. Infine.
